ಜುಲೈ - ಡಿಸೆಂಬರ್ 2017ರ ಸಾಹಿತ್ಯ ಸಿಂಚನ ತ್ರೈಮಾಸಿಕ ಪತ್ರಿಕೆಯಲ್ಲಿ ನನ್ನ ಕವನಗಳು

ಬೆಳಕು

ನನ್ನೊಳಗಿನ ನೀನು
ಕತ್ತಲೊಳಗಿನ ಬೆಳಕು

                  --ಕವಿತಾ ಗೋಪಿಕುಂಟೆ

ಸದ್ದು

ನೀರಿಗೆ ಜಿಗಿವಾಗ ಬರುವ ಶಬ್ದ
ನೀರಿಂದ ಮೇಲೇಳುವಾಗ ಬರುವುದಿಲ್ಲ
ತಪ್ಪು ಮಾಡುವಾಗ ಆಡಿಕೊಂಡು ಸದ್ದು ಮಾಡುವ ಜನ
ಒಂದೊಳ್ಳೆ ಕೆಲಸ ಮಾಡುವಾಗ ಮಾತಾಡೋದಿಲ್ಲ
ಇದರಿಂದಲೇ ತಿಳಿಯುತ್ತದೆ
ಸದ್ದಿನಿಂದಿರುವ ಉದ್ದೇಶವೇನೆಂದು

                                      --ಕವಿತಾ ಗೋಪಿಕುಂಟೆ

ಓ ಜೀವವೇ

ಓ ಜೀವವೇ
ಖುಷಿಯೆಂದರೆ ನನಗೆ,

ನನ್ನದಲ್ಲದ ಊರಿನಲಿ
ಜನತುಂಬಿದ ಬೀದಿಯಲಿ
ನಮ್ಮದೇ ಭಾಷೆಯಲಿ
ನಿನ್ನನ್ನು ಕೂಗುವುದು

ತುಂತುರು ಮಳೆಯಲಿ
ಬಿಳಿಮರಳ ಬೀಚಿನಲಿ
ನಿನ್ನೆಜ್ಜೆ ಮೇಲೆ
ನನ್ನೆಜ್ಜೆ ಇಡುವುದು

ಬಿದಿರ ಕಾಡಿನಲಿ
ಬೀಸೋ ಗಾಳಿಯಲಿ
ನಿನ್ನನ್ನೆ ಬೆನ್ನಟ್ಟಿ
ಓಡೋಡಿ ಬರುವುದು

ಅವರ ದೇವಾಲಯದಲ್ಲಿ
ಅಲ್ಲಿನ ಸಂಪ್ರದಾಯದಲಿ
ಅವರದೇ ಭಾಷೆಯಲಿ
ನಿನಗಾಗಿ ಬೇಡುವುದು

ಇಷ್ಟೆಲ್ಲಾ ಗಳಿಗೆಗಳ
ಬಚ್ಚಿಟ್ಟು ಕಾಯುತಿರುವೆ
ಬಂದುಬಿಡು ಬಹುಬೇಗ
ನಾನಿರುವ ಊರಿಗೆ

                     --ಕವಿತಾ ಗೋಪಿಕುಂಟೆ

ದಾರ

ಸೂಜಿ ನಾವಾಗಿ

ದಾರ ಬಾಳದಾರಿಯಾದಾಗ

ದಾರಕಾಕುವ ಗಂಟೇ ತವರು

ದಾರದ ಬುಡದಿ ಗಂಟಿಲದಿರೆ

ಹೊಲಿಗೆ ಸಾಧ್ಯವಿಲ್ಲ

ತವರ ಮರೆತ

ಯಾರ ಬಾಳಿಗೂ ಅರ್ಥವಿಲ್ಲ

            --ಕವಿತಾ ಗೋಪಿಕುಂಟೆ

2/7/2017 ರ ಪ್ರಜಾ ಪ್ರಗತಿ ದಿನಪತ್ರಿಕೆಯಲ್ಲಿ ನನ್ನಕವನ "ತುತ್ತು ಅನ್ನಕ್ಕಾಗಿ"

ಸಾವ ಕೆಸರು

ನಿನ್ನ ನೆರಳಿಡಿದು
ಹಿಂಬಾಲಿಸಿರುವೆ
ಮಾತಾಡದ
ಕಾಲ್ಗೆಜ್ಜೆ ಜೊತೆ
ಮಾತಾಡುವ ಪರಿಗೆ
ಹೊಳಪಿಲ್ಲದ
ಮೂಗುತಿ ಬೆಳಕಲ್ಲಿ
ದಾರಿ ಹುಡುಕುವ ದಾಟಿಗೆ
ಮನಸಾರೆ ಮನಸೋತು
ಸಾವ ಕೆಸರಲೂ
ಕನಸ ಕಮಲವ ಬಿತ್ತಿ
ಪ್ರೀತಿ ಮೊಗೆಯಲು
ಹಿಂಬಾಲಿಸಿರುವೆ

                       --ಕವಿತಾ ಗೋಪಿಕುಂಟೆ 

ಭಾವಬಣ್ಣ

ಕಳ್ಳ ನೋಟದ
ಬಾಣನಾಟಿ
ಕೆನ್ನೆಗುಳಿಯಲಿ
ಮೊಡವೆ ಮೂಡಿ
ನಿನ್ನ ಭಾವಬಣ್ಣ
ನನ್ನ ಮೊಗದ
ರಂಗೇರಿಸಿದೆ

                  --ಕವಿತಾ ಗೋಪಿಕುಂಟೆ 

ತುಂತುರು

ಇನಿಯ ಜೊತೆಗಿರಲು
ತುಂತುರು ಮಳೆಬರಲು
ಇನ್ನೇನು ಬೇಕು
ಮನ ತಣಿಯಲು

                     --ಕವಿತಾ ಗೋಪಿಕುಂಟೆ 

ಕದನ

ನನ್ನೊಳಗಿನ
ಮೌನ ಕದಲಿಕೆಗೆ
ನಿನ್ನೊಳಗಿನ
ಪ್ರೀತಿ ಕದನ

                  --ಕವಿತಾ ಗೋಪಿಕುಂಟೆ 

ಓಡಿ ಬರುವಾಗ

ನೀ ಓಡಿ ಬರುವಾಗ
ಹಲುಬಿದ ಕಣ್ಣಲ್ಲಿ
ಪನ್ನೀರ ಪೊರೆತ

ನಗು ಕಂಡಾಗ
ಮನದಲ್ಲೇನೋ
ಪುಳಕ

ಮೌನವರಿಸಿದಾಗ
ಜೀವಹಿಂಡಿದ
ಕಂಪನ

ಕೈಹಿಡಿದು ನಡೆವಾಗ
ತಂಗಾಳಿಯಲಿ
ಜೀಕುವುದು ಮನ

                         --ಕವಿತಾ ಗೋಪಿಕುಂಟೆ 

ಹಚ್ಚೆ

ಹಚ್ಚೆಯಂತೆ
ಹಚ್ಚಾಗಿಬಿಡು
ಹೃದಯದಲಿ
ಸರಿತಪ್ಪುಗಳ
ಭ್ರಮೆಯ ಸರಿಸಿ

                   --ಕವಿತಾ ಗೋಪಿಕುಂಟೆ 

ಪೋಣಿಸು

ನಿನಗಾಗಿ ಕೂಡಿಟ್ಟ
ಮಾತುಗಳ
ಬೆಚ್ಚಗೆ ಬಚ್ಚಿಟ್ಟಿರುವೆ
ಕವಿತೆಯಲ್ಲಿ
ಪೋಣಿಸು ಬಾ
ಪ್ರೀತಿ ಎಳೆಯಲಿ

               --ಕವಿತಾ ಗೋಪಿಕುಂಟೆ 

ನಿನ್ನೊಂದಿಗೆ

ನಿನ್ನೊಂದಿಗಾಕೋ
ಪ್ರತಿಹೆಜ್ಜೆಯ ಜೊತೆ
ಎದೆಬಡಿತ
ಏರಿಳಿದಿದೆ
ಉಗುರು ಬಣ್ಣವು
ಮಿನುಗಿ ಮೂದಲಿಸಿದೆ
ಮದರಂಗಿ ನಾಚಿ
ತುಸು ಹೆಚ್ಚೇ ಕೆಂಪಾಗಿದೆ

                           --ಕವಿತಾ ಗೋಪಿಕುಂಟೆ 

ನವಕಾವ್ಯ

ನೆನಪುಗಳ ಹಾವಳಿಗೆ
ಕನಸುಗಳ ಪ್ರತಿದಾಳಿ
ಮುಗಿಲಿಗೂ ಮಿಗಿಲಾಗಿ
ನವಕಾವ್ಯ ಬರೆದಿದೆ ತಂಗಾಳಿ

                                --ಕವಿತಾ ಗೋಪಿಕುಂಟೆ 

ಕಿರುಮನ

ಕಿರುಬೆರಳಿಡಿದು
ಕಿರುನಗೆ ಸೂಸಿ
ಕಿರುನೋಟದಿ
ನಿನ್ನ ಕಂಡು
ಸಂಭ್ರಮಿಸುತಿದೆ
ಕಿರಿದಾದ ಈ ಮನ

                       --ಕವಿತಾ ಗೋಪಿಕುಂಟೆ

ಪುಟಿವ ಮನ

ಸೆಳೆತ ತೀರದ
ತೀರ ಯಾನ
ಕಾಲಷ್ಟೇ ಚಲಿಸುತಿದೆ
ಮನವು ಮೌನ
ಕಿವಿಯಲ್ಲೋ  ಕಳೆದಿದೆ
ಒಳಗಣ್ಣು ಮುಚ್ಚಿದೆ
ಸಾಗಿದೆ ನಡಿಗೆ
ದೂರ ದೂರ
ಹೆಜ್ಜೆಗುರುತ ನುಂಗುತಿದೆ
ಸುಪ್ತ ಮನ
ತಿರುಗಿ ಉಳಿಸಲೆಂದೇ
ಪುಟಿವ ಮನ

                           --ಕವಿತಾ ಗೋಪಿಕುಂಟೆ 

ಮನದ ಧ್ಯಾನ

ಪ್ರೀತಿ ದ್ವೇಷವ
ಕಂಡ ಮನ
ಮಾತು ಬಿಟ್ಟಿದೆ

ಶಾಂತಕೊಳಕೆ
ಕಲ್ಲೆಸೆಯುತಾ
ಧ್ಯಾನಿಸುತ್ತಿದೆ

ಅಲೆಗಳ
ರಿಂಗಣಕೆ
ಕಂಪಿಸುತ್ತಿದೆ

                  --ಕವಿತಾ ಗೋಪಿಕುಂಟೆ 

ಸೋಜಿಗ

ಬಂದು ಬಳಿ ನಿಲ್ಲದೆ
ಮಂಡಿಯೂರಿ ಕೇಳದೆ
ಸೆಳೆತದೆಳೆಯ
ಬೀಸಿ ಸೆಳೆದು

ಅಪರಾಧವಿಲ್ಲದೆ
ಆಪಾದಿಸಿ
ಅಪಾರವಾಗಿ
ಕಾಡಿ ಸೆಳೆದು

ಸೂಚನೆಯೇ ಇಲ್ಲದೆ
ಸೋಜಿಗದಂತೆ ಸೆಳೆದು
ಕದ್ದೊಯ್ದನಲ್ಲ ಮನವ
ಕಾಣದೆನ್ನ ಕೃಷ್ಣನು

                          --ಕವಿತಾ ಗೋಪಿಕುಂಟೆ 

ಪ್ರೀತಿ ಸುಳಿ

ಗುಂಗುರು ಕೂದಲ
ಕಡುಕಪ್ಪಿಗಿಂತ
ಕಟುವಾಗಿ ಕಾಡುತಿದೆ
ನೀಲ ಬಣ್ಣ

ಕೊಳಲ ನಾದದ
ಗುನುಗು
ಪ್ರೀತಿ ಸುಳಿಯಲಿ
ಸುಳಿಸಿ

ಹಿಂಡುತಿದೆ ಜೀವ
ತೆರೆವ ಮುನ್ನವೆ
ಮನದ ಭಾವ

                --ಕವಿತಾ ಗೋಪಿಕುಂಟೆ 

ಕೊಳಲ ಮೌನ

ನಿನ್ನ
ಮೌನವ
ಸಹಿಸುವೆ
ಕೊಳಲ
ಮೌನವ
ಸಹಿಸೆನು

                   --ಕವಿತಾ ಗೋಪಿಕುಂಟೆ 

ನೀನಾ

ನೀ
ಮುಗಿಲಮೌನ
ನಾ
ಧರೆಯದನಿ

                  --ಕವಿತಾ ಗೋಪಿಕುಂಟೆ 

ಬರದ ಸಂಭ್ರಮ

ಸುಡುಬಿಸಿಲಿಗೆ
ಒಣಗಿದೊಲ
ಯುಗಾದಿ ಸಂಭ್ರಮದ
ಜೊತೆ ಮಾತಾಡುತ್ತಿತ್ತು

ಹರೆ ಹೊಟ್ಟೆಗೆ
ತಿಂದ ಕರು
ಅಪ್ಪ ಕಟ್ಟುತ್ತಿದ್ದ
ತೋರಣವ ನೋಡುತ್ತಿತ್ತು

ಕರುಕಂಡ ಹಸು
ಹಾಕಿದ ಗುಟುರು
ಉಯ್ಯಾಲೆಯಲ್ಲಿದ್ದ
ನನ್ನ ಸೆಳೆದಿತ್ತು

ಹಜಾರದಿ ಕೂತಿದ್ದ
ಅಜ್ಜನ ಬಿಸಿಯುಸಿರು
ಹಣೆಮೇಲಿನ ಶೆಖೆನೀರ
ಹಿಂಗಿಸಿಯೆಬಿಟ್ಟಿತ್ತು

                      --ಕವಿತಾ ಗೋಪಿಕುಂಟೆ

ಹನುಮನುಸಿರು

ಯಾರೋ ಕೊಟ್ಟ ದೇಹಕೆ
ನೀ ಕೊಟ್ಟೆ ಜೀವದ ಉಸಿರು
ನಾ ನಡೆವ ದಾರಿಗೆ
ನೀ ತೊಟ್ಟೆ ಗೆಲುವ ಹಸಿರು
ಯಾವುದೂ ನನ್ನದಲ್ಲ
ನನಗೇನೂ ಬೇಕಿಲ್ಲ
ನೀ ಕೊಟ್ಟ ಈ ಉಸಿರ
ನೀನೇ ತೆಗೆದುಕೋ
ಪವನಸುತನಲ್ಲಿ
ಪಾವನಿಯಾಗುವ
ಭಾಗ್ಯವನ್ನಷ್ಟೇ ಕರುಣಿಸು

--ಕವಿತಾ ಗೋಪಿಕುಂಟೆ 

ಗರಿಕೆ

ಕಾಲಲ್ಲಿ ವಸಕಿ
ಕೈಯಲ್ಲಿ ಕಿತ್ತು
ಬುಡ ಅಗೆದು
ಸುಟ್ಟರೂ
ಮತ್ತುಟ್ಟಿ ಬರುವ
ಗರಿಕೆಯಾಗಬೇಕು
ಛಲ ಬಿಡದೆ
ಅಂಟಿ ತನ್ನತನವ
ನಿರೂಪಿಸಲುಬೇಕು

                 --ಕವಿತಾ ಗೋಪಿಕುಂಟೆ 

ಬದಲಾವಣೆ

ಬದಲಾವಣೆಗೆಂದು ಎಲ್ಲಿಹೋದರೂ
ಅದುವೇ ಕುಟ್ಟುವ ಕೆಲಸ
ಸುತ್ತಾ ಇರುವ ಮುಖಗಳಷ್ಟೇ ಬೇರೆ
ತೋರುವ ಗುಣಗಳು ಒಂದೇ

                              --ಕವಿತಾ ಗೋಪಿಕುಂಟೆ 

ಬೇಯುವ ಗತ್ತು

ಬೆಂದವರಿಗೆ ಗೊತ್ತು
ಬೇಯುವ ಗತ್ತು
ನೀರಗುದಿಯ ತಾಳಕೆ
ಕುಣಿಯುವ ಗಮ್ಮತ್ತು

                 --ಕವಿತಾ ಗೋಪಿಕುಂಟೆ 

ಕಾಫಿ

ನಲ್ಲ ನೆನಪಾದಾಗಲೆಲ್ಲಾ
ನಗು ಸೆಳೆವಂತೆ
ಕಪ್ಪು ಕಂಡಾಗಲೆಲ್ಲಾ
ಕಾಫಿ ಕರೆಯುತಿದೆ

                       --ಕವಿತಾ ಗೋಪಿಕುಂಟೆ 

ಬದುಕು

ಬದುಕು ಬವಣೆ
ಭಾವನೆ ಸಾಧನೆ
ನಿರಂತರ
ಈ ಜಗದೊಳಗೆ

                 --ಕವಿತಾ ಗೋಪಿಕುಂಟೆ 

ಭಾವಾಂತರಂಗ

ನಾನೆಂಬ ನನ್ನೊಳಗೆ
ನೀನಾಗಿ ಬಂದು
ನಾವೆಂಬ ಭಾವತಂದ
ಭಾವಾಂತರಂಗ
ಅನುಕ್ಷಣವು ನಿನಗಾಗಿ
ಚಡಪಡಿಸುವುದು
ನನ್ನಾಂತರಂಗ  

                       --ಕವಿತಾಗೋಪಿಕುಂಟೆ 

ಸಿಲ್ಕ್ ಬೋರ್ಡ್ - ಬಿಟಿಎಂ

ಬಿಸಿಲ ಬೇಗೆಯ
ರುಚಿನೋಡದವನನ್ನ
ಸಂಜೆ ಎಂಟರ ಸಿಲ್ಕ್ಬೋರ್ಡ್
ಸಿಗ್ನಲ್ನ ಟ್ರಾಫಿಕ್ಕಲ್ಲಿ ನಿಲ್ಲಿಸಿ
ಮನೆಯೂಟ ಜರಿವವನ
ಬಿಟಿಎಂನಲ್ಲಿರೋ ಪಿಜಿಗೆ
ಸೇರಿಸೆಂತು ಕವಿಯಾತ್ಮ    

                             --ಕವಿತಾ ಗೋಪಿಕುಂಟೆ 

ಮನಮೋಹಕ

ಮೋಹನನ ಮನೋಹರ
ಗೀತಿಕೆಗೆ ಮನಸೋತ ರಾಧೆ
ಮನಮೋಹಕ ನೋಟಕ್ಕೆ
ಸೆರೆಸಿಕ್ಕಿ ಕೊನೆವರೆಗು
ಅವನು ಪ್ರೇಮಿಯಾದಳು

                           --ಕವಿತಾ ಗೋಪಿಕುಂಟೆ 

ಪ್ರೀತಿ ಪರಿಮಳ

ಕೃಷ್ಣನ ಕೊಳಲ
ಗಂಧ ನಾದದಿ
ರಾಧೆಯ ಕಾಲ್ಗೆಜ್ಜೆ
ಸದ್ದಿನ ಘಮ ಬೆರೆತು
ಜಗದ ತುಂಬೆಲ್ಲಾ
ಹರಡಿದೆ ಪ್ರೀತಿ ಪರಿಮಳ
ಪ್ರೇಮಿಗಳಲ್ಲಿ ತಂದಿದೆ
ಸಿಹಿನೋವ ತಳಮಳ

                       --ಕವಿತಾ ಗೋಪಿಕುಂಟೆ